عايز اتجوز

اغنيه جديده كده طالعه اليومين دول كوميدى بتقولك ايه ياسيدى انا عايز اتجوز


فكريتنى بمشكلة الجواز عند اغلب الشباب والشابات فى مصر خاصة وفى كتير من الدول العربيه عاماًٌََُ بس هتكلم انا بقا عن المشكله بالنسبه للشباب مع ان المشكله نفسها بتبقا مشكله للشابات بطريقه مختلفه وهتكلم عن الموضوع بالنسبه للشباب العادى اللى بيكافح علشان يكون ويبتدى حياه كريمه انما الشباب اللى اهلهم اثرياء فمش مفيد ليه قوى الموضوع




الاخ اللى عاوز يتجوز وفى بداية حياته مطلوب منه شقه ودا غير انها تتوضب ودا غير الايجار الشهرى و دا غير شبكه وعفش ومصاريف الجواز

طيب ده كله هيجيبو منين الشاب والمرتبات معروفه كلها عندها انيميا حاده مزمنه


طيب نبدء بالشقه لانها المفروض الاساس نقول الشقه على اقل تقدير أيجار ولما نقول ايجار يبقا بنتكلم فى خلو رجل مبلغ وقدره

ندخل بقا على توضيب الشقه كهربه وسباكه ونجاره وبلاط ومحاره وسيراميك ودهانات والخ

يلا عشان كل الشباب يستعدو لتعب قلب العمال والصنيعيه والمواعيد البايظه




وبالمناسبه ممكن تطلعلك مواقف ماتستغربش تدفع فلوس لشقه فى عماره تحت الانشاء ولما تيجى تستلم تلاقى صاحب العماره مش موفى باتفاقو وبناء عليه تطلب فلوسك يمطلك ومواقف مشابهه



او تيجى تتقدم لوحده وتجيب اهلها يشوفو الشقه يقولولك شقتك دى صغيره شويه عاوزين شقه اكبر لبنتنا مع ان الشقه ملك مش ايجار وبقم يتشرطو دا موقف حصل قصادى الراجل ريحهم وقلهم ماشى ونزلهم روحهم وحلقلهم ولا عبرهم مكنتش مسئلة شقه قد مكانت مسئلة طمعهم واتجوز واحده تانيه وجبلها بدل الشقه عمارتين وفيلا وشاليه




او تيجى تتقدم لواحده وتقولهم انا شغال فى شركه خاصه وبعقد يقولولك لازم تبقا شغال شغلانه ثابته دا بردو موقف حصل لواحد تانى الراجل جاهز والبنت شايفاه زوج كويس والام اللى بتقولها ارفضى دى شغلانته مش مثبت بيها مع ان الشاب فى قمة الاخلاق والتدين والالتزام

هو مين اصلا عارف يشتغل؟ وهو مين اللى فى ايدو يختار ثابته ولا بعقد ومختارش ثابته


ربنا يرحم ايام زمان لما كان الراجل يخرج للجهاد فكانت النساء يروحو لزوجته يقولولها

لا تدعيه يذهب فقد لا يرجع، فمن سينفق عليك وعلى أولادك

فكانت الزوجه المؤمنه ترد بثقه ويقين

لقد عرفت زوجي أكالاً ولم أعرفه رزاقاً، فإذا مات الأكال بقي الرزاق


مافيش تعليق بعد الجمله دى الا الحديث النبوى اللى بيقول

إذا أتاكم من ترضون خلقه ودينه فزوجوه، إلا تفعلوا تكن فتنة في الأرض وفساد كبير



نيجى احنا نلااقى العكس انسان محترم ومتدين وموقفنله الجوازه


ونيجى على اهم حاجه فى رأيى وهو العروسه او شريكة الحياه

بتدور على انسانه متدينه خلوقه تتحمل معاك الحياه على حلوها ومرها

وفى كتير بيدورو على مواصفات شكليه بس وفى رأيى دا كلام مش مظبوط

وفى شباب بيدورو على مواصفات تانيه

ولاكن اظفر بذات الدين تربت يداك


وبالمناسبه ممكن تتقدم لواحده وشايف انها كويسه وتلااقى واحده قريبتك تقولك دى معصعصه ولا لدغه ولا حاجات من النوع ده

فماتنساش بقا تاخد الست الوالده وشوية البندق وتعمله كشف نظر و الامتحان المشهور


طيب هنقول انك لقيتها ولو انها عمله نادره برغم كترة البنات زى ما الشاب الملتزم المتحمل المسئوليه عمله نادره


نيجى بقا لمرحلة متطلبات البيت والعفش وتكلفتها الكبيره طبعا

وهنتكلم كمان على تكاليف حفلات الشبكه والفرح و و و الخ

وبردو هتلااقى اللى خارج بيمصمص شفايفه ان فى حاجه مش عجباه





ونقول كمان الشبكه والدهب واسعارو الغاليه بقا المعيار عند كتير هيجيب دهب بكام وهيشترلها ايه مبقاش المعيار الاخلاق والاصل والفصل والثقافه


وبالمناسبه حصل بردو واحد معرفه اتقدم لوحده واتفق مع ابوها على كل حاجه على قد مقدرتو واتفاقهم وقال هجيب دهب بمبلغ كذا فى النهايه اتفقو يزود شويه واتفقو على المبلغ وكان مبلغ محترم

جم يوم ما هيشترو الدهب عند بتاع الدهب وعمة العروسه تتكلم وتقول دا قليل وادفع ازيد وهتلها اكتر وهيبدئو يختلفو فى محل الدهب وعمة العروسه مصممه



الحقيقه انا اللى كنت مضايق جدا لان والد العروسه هو المتفق وساكت وعمة العروسه بتتكلم وكل اللى قلتوانا هو كان اتفاق رجاله هو ولا كان اتفاق حريم؟





والحمد لله ان مكنتش انا العريس والا كنت سبتهم ومشيت علشان مش ده المكان ولا الزمان المناسب للأختلاف


بقا الاهتمام بكلام الناس والمظاهر الاجتماعيه والجانب المادى غالب ونسى كتير من الناس اوامر الاسلام بتيسير الجواز

إن جاءكم من ترضون دينه وخلقه فزوجوه



والمفروض اسرة الشاب والبنت يساعدو فى تكوين اسره مش بقول مساعده ماديه اقصد مساعدة تفهم انهم لسه فى بداية الحياه ومش بالضرورى الكماليات تبقا موجوده فى اول الجواز

لكن الغالبيه بقت عاوزه تبدء من القمه

والصحيح ان الاتنين لازم هما اللى يوصلو للقمه مع بعض