بابا يا بابا

بابا يا بابا

بمنتهي البراءة
سألتني بنتي نور
ف أربع خمس أمور
مش ف كتاب القراءة
قالتلي بابا يا بابا
مش أنت يا بابا
بتكتب أغاني
وتقول إشعار
أنا سمعت الشيخ يا بابا
بيقول انك يا بابا
ها تروح النار
زى الناس الوحشين
الحرامين الكفار
قولي يا بابا
يعني أية استعمار
يعني أية نيل
يعني أية هرم
ومين إلي حط النسر دة
فوق العلم
يعني أية يا بابا استفتاء
ويعني أية انتخاب
ويعني أية حر
ويعني أية نصاب
ويعني أية اغتصاب
ويعني أية اختلاس
ويعني أية هجاص
ويعني أية خصخصة
ويعني أية يا بابا دستور
ويعني أية معارضة
ويعني أية مظاهرة
ولية النهاردة
خدنا إجازة من المدرسة
قولي يا بابا
يعني أية قهر
وأين يقع خط الفقر
ويعني أية حظ
ويعني أية زهر
ويعني أية يا بابا
حرية
يعني أية إنسان
ويعني أية سرطان
يعني أية يا بابا
خربوها
ومين دول ولاد القطقوطة
ومين دي
سمارة يا بابا
وازاي يا بابا
ضاعت من قلبك
وكنت فين لما خربوها
يا بابا
بابا
أنت معايا
فية يا بابا ناس
بتقول كفاية
وفية عساكر
ماسكين عصايا
وبنات متعورين
وتانين ماشين بيضحكوا
يا بابا هما دول اسرائليين
هما دول اسرائليين
قولتلها
نور
ممكن أسالك سؤال
قالتلي
أتفضل يا بابا
قلتلها
هية قناة سبيس تون
رقم كام
وخدتها
عشان تنام

علي سلامة الدستور 7_3_2007

هههههههههههههههههه
مشكلته انه أخدها عشان تنام أو هو اللي ينام عن الحقيقه
ههههههههههههههههههه
البت دي شبهي وانا صغيره
ههههههههههههههههههه
بس انا كان لكل سؤال جواب بطريقه غير مباشره
ههههههههههههههههه

الموقف دة فعلا بيتكرر معايا كتير
الواد ابو لسان زالف والواد التاني ابو نص لسان
بيهروني اسئلة ولما اغلب معاهم ومعرفش اجاوب
افضل اقلب في القنوات لغاية ملاقي كرتون
ولو ملقيتش في التلفزيون اشغلهم الكمبيوتر
اي حاجة بس يحلو عني
ويبطلوا اسئلة من الي تغيظ

يبقى مش فهمت تعليقي
انا قاصدي اننا نوري أولادنا الواقع بطريقه مبسطه يفهموها ونعلمهم ألمبادئ اللي يتعاملوا بيها مع الأمور حاسه انك مافهمتش تعليقي