عنتر وعبلة بعد الجواز (حلقات مسلسلة)

--------------------------------------------------------------------------------

كلنا عارفين حكاية عنتر وعبلة
قريناها في كتاب او شفناها في فيلم
او حتي كحدوتة قبل النوم
لكن ولا حاجة من دول قالت لنا اذا كان عنتر وعبلة اتجوزو بعض ولا لا
ولو اتجوزو بعض يا تري اية اللي حصل بعد كدة
منعرفش
علشان كدة هنحاول نعرف دلوقتي اية اللي حصل بعد الجواز
علي فكرة الحلقات دي منقولة
بس هحاول انقلها بتصرف علشان كلنا نشارك
وممكن كل واحد يكتب حلقة
والان الي الحلقة الاولي



عنتر-يا فتاح يا عليم يا رزاق يا كريم في أيه ع الصبح
عبلة- قوم شوف أبنك يا أخويا
- ماله
- مش عايز يروح المدرس قال أيه لازم ندفع المصاريف
- قد أيه بقي المصاريف دي
الواد -15 ناقة حمر و معزيتين كروهات
- نعم نعم نعم نعم ده أنا أتجوزتك أمك تخليص حق
الواد - مليش دعوة بقي أتصرفوا أه صحيح المدرسة مطلعة رحلة بالباخرة 15 يوم في بحر الظلمات نروح فيهم باريس ولندن و ميلانو
عنتر- ميلانو دي قبائل جديدة دي ياد ولا أيه
الواد - قبائل جديدة أيه بس أي الجهل they are new cities in our world
عنتر- هه
- طبعا عشان مروحتوش IG قصدي دي مدن جديدة في العالم
- ودي بقي مصاريفها كام
- ناقة بمبي مسخسخ
- يا بني النوق البمبي المسخسخ مش موجودة غير عند ملك الفرس
- معرفش بقي أتصرف أنت مش قلتلي يا بني أنا بشتغل عشان أعيش في مستواك إحسن من اللي عشت أنا فيه . مليش دعوة أتصرف
- عنتر - ما تقولي حاجة يا وليه بدل ما أنتي قاعدة
عبلة - يعني أعمل أيه يعني كان لازم يعني تدخلة مدرسة لغات . أشرب بقي يا حلو... مزمز ميرندا
-عنترة أيه ميرندا دي كمان
- ما تأخدش في بالك
طيب يبقي المطلوب كله 15 ناقة حمر وناقة بمبي مسخسخ و معزيتين كروهات ...

خرج عنترة من خيمته .. مرددا أنا كان مالي ومال الجواز ما أنا كنت قاعد سلطان زماني
كان لازم يعني يا أمي تنزلي زن عليا أتجوز أتجوز أديني أتهببت
أمتطي حصانه الأسود 69572 ملاكي عبس وتوجه نحو الشرق إلي ملك الفرس مردداً
حسبي الله ونعم الوكيل
حسبي الله ونعم الوكيل
حسبي الله ونعم الوكيل
وأخذ يبتعدا رويداً رويداً


......
.......... يا تري حيحصل أيه بين عنتر وملك الفرس .. موعدنا الحلقة الجاية وتصبحوا علي خير

يتبع

هههههههههههههههه
بس هما في الواقع مااتجوزوش
ههههههههههههههه

هههههههههههههههههههههههههههه

عم عنتر وعبله كانو مصريين برضو؟؟؟؟

ننتظر اليتبع يا سي عادل ونشوف

بس مش تتأخر يخويا علينا

ههههههههههههههههه

هههههههههههه... ايه دا ... هما اخيرا هيتجوزوا .,.. طيب جابوا مأذونه ولا مأذون ... عنتر وهبله اتجوزوا يا جدعااااااااااااان




في انتظار البقيه طبعا

شكرا علي المتابعة الجميلة
الفكرة ان كل واحد ممكن يستخدم التيمة دي
ويعمل منها اسقاط علي شئ معين
زي مثلا عنتر وعبلة في طابور العيش
او عنتر في السيبر
او عبلة في الكوافير
او مغامرات عنتر وعبلة في الاتوبيسات
حاجات كتير زي كدة
ياريت كل واحد يحاول يكتب حلقة من المسلسل دة
ننتظر ابداعاتكم
والان الي الحلقة الثانية

الحلقة التانية عنتر في بلاد فارس

توجه عنتر إلي ملك الفرس بعد أن عبر البراري والقفار وأصابه الحر والعفار
بعد أن دلف (واخدين بالكم من دلف دي ) إلي قصر ملك الفرس و فقابله الملك بالترحاب
أهلااااااااااااااا يا أبو العناتير
عنتر- أزيك ياد يا ملك أخبر أبوك وأمك أيه
-أسكت مش أمي حبت تروح مصر عند قرايبها في المنصورة .بعد ما رجعت
كان لونها أزرااااااااااق و مبتتكلمش ودايما مسهمة
- وبعدين
بس يا عنتر يا أخويا قعدت علي كدة شهرين وأول مان طقت راحت مصوتة
قلتلها مالك يأمه
قالتي أسكت يا بني مش أمك كانت هاتموت
-ليه يا أمه
-أول ما ركبت القطر من محطة منف رايحة المنصورة لقيتلك القطر راحب مقلوب بينا
بس الحمد لله ماموتش
طيب كويس
كويس أيه ده لما سألتهم لما فوقت أيه اللي حصل .قال أيه في واحد شد الجزرة
طيب ودي فيها أيه فرضنا أن واحد جعان شاف قدامه أكل مايكلش يعني
قعدوا يفهوموني طبعا مفهمتش. ركبت البيجو . سلمت علي حبايبي طلبت مايه أشرب
ألاقيلك الواد جايبلي مياه أول ما شربتها جاللي تسمم عقلي .. أول ما فوقت لقيت الدكتور بيقيس الضغط.. سألتهم ليه قاللي جالك السكر
سكرا. يا نهار مش فايت.. نسيت أقولك الدكتور برضه أكتشف أن عندي بلهارسيا من إنقلاب القطر في الترعة. أمك أتبهدلت كتير في مصر يا بني. مستحملتش يا عنتر أسبوع راحت مفيصة مننا .يلا الله يرحمها بقي

عنتر- بس كفاية وأنا اللي جايلك تساعدني لقيتك عايز مساعدة
الملك - خير يا قمر
- الواد أبني عايز مصاريف المدرسة 15 ناقة حمرا ومعزتين كروهات وناقة بمبي مسخسخ
الملك - بس كده قوي قوي خدت شيك اهوة اصرفة وهات اللي نفسك فية
- ربنا يخليك يا باشا أما أكلم أم العيال عشان أبشرها.. بالحق معاك رصيد
- لا والله أصلي مادفعتش الفاتورة فقطعوا الخط
- أنت أم نبيل ولا جودةفون
-لأ أم نبيل
-جودة فون أحسن ..طيب يلا بقي سلام ألحق أروح المزرعة قبل الليل
- أنت ما نسيتش حاجة ؟
- حاجة أيه؟
-وصل الأمانة.
كدة برضه تأخد علي صاحبك وصل أمانه.
ده أنا أخد علي أبويا وصل مش صاحبي
- صحيح يانهيتك ما أنتهيت والطبع فيك غالب. ديل الملك لم ينعدل وإن علقوا فيه قالب
الملك :أنت حتخطب ..أنجز
بعد أن مضي عنتر علي الوصل أعطاه الملك شيك بخمسة وعشرين ألف درهم تصرفه من بنك تشيس برجر ..قصدي تشيس منهاتن فرع العتبه

أمتطي حصانه الأسود 69572 ملاكي عبس برضه وتوجه نحو الغرب نحو مصر مردداً
حتي أنت يا صاحبي طلعت
حسبي الله ونعم الوكيل
حسبي الله ونعم الوكيل
حسبي الله ونعم الوكيل
وأخذ يبتعدا رويداً رويداً

بكرة يا حلوين نشوف عمل ايه عنتر في بنك العتبة.. يلا تصبحوا علي خير

ههههههههههههههههههههههههه

والله ما انا عارفه انت بتجيب الكلام والافكار دي منين

بس والله برافو يا علي

جمييييييييييييييييييل

وبرضو بستنى يتبع

وانا مش هكتب ولا حلقه

هسيب حصتي ليك

الحلقة التالتة

عنتر في مصر


وراح عنتر علي مصر وكان فاكر حيخلص قوام قوام . بعد أن وصل راح مشاور لسواق حصان تاكسي وكان الحوار

- سلام عليكم
- لخص
- العتبة
- مالها
- مملهاش عايز أروح العتبة
- بريزتين
-أزاي يعني
- يعني عشرين درهم
- كتير
- وبعدين بقي
- خلاص خلاص أنا اللي محتاجك " عنتر بيبرطم: ربنا يهدك"
بعد أن وصل العتبة أمام البنك
- أخيراااااااا
فدخل البنك لقي زحمة رهييييييييبة وقف في الطابور 3 أيام وبعدين جه دوره فقابل الموظف
- سلام عليكم
- لخص
- عايز اصرف الشيك ده
ناول الشيك للموظف الذي أخذ ينظر لعنتر بقرف
- شباك سبعة
- ده أنا واقف بقالي 3
-قولنا شباك سبعة اللي بعده
توجه ألي شباك سبعة و الغيظ يكاد أن يفتك به
قعد برضه 3 أيام وبعد أن وصل للي الموظف قائلاً : عايز أصرف الشيك ده
- روحه أختمه يا حضرة
-فين
-شباك 99 الدور التاسع
طبعا مفيش أسانسير وخدها كعابي.
- عاوز أختم الشيك
- أدفع تسعة درهم
- فين
في الخزنة
فين دي الدور الخامش شباك 55 الي بعدة
ونزل للخزينة دفع تسعة درهم ورجع
- كويس راح خاتم الشيك
- نزل شباااك سبعة وأعطاه الشيك
- الموظف - الختم ده مش سليم
- النسر ده شكله أنثي مش ذكر
عنتر- يا أعم أبوس جذمتك بص أدي راسك أبوسها مشيني أنا ف عرضك بقالي 15 يوم عشان شيك مشيني الله يخليك
وكاد ان يبكي
أسف مقدرش أصرفه
راح مطلع عنتر سيفه- بص أنا مش خارج من هنا يا أهلي يا زمالك قصدي يا قاتل يا مقتول

الموظف راح دايس علي الجرس اللي تحته اللي موصل علي القسم
هوباااا 5 دقايق كان هنا وقبضوا علي عنتر
قدامي ياد
ده أنا عنتر
إن شالله تكون فارق حسني ع القسم يعني ع القسم

نكمل بكرة يا حلوين
عنتر في قسم العتبة

هههههههههههههههههههههههههه

يا ريتني اعرف المسميات والاسماء بتاعتكم

كنت ريحتك شويه

وكتبت عنك يا عادل

بستنى اللي بعده

ياريتهم ما اتجوزوا
هههههههههههههههههههههههههههههه

مش شرط يا وفاء انك تعمليها بالطريقة المصرية
اعمليها زي ما تحبي
تخيلي مثلا عنتر وهو بيحضر او بيشترك في مظاهرة او في الانتفاضة
او مغامرات عنتر وعبلة في احد المعابر
او مغامرات عبلة في فندق خمس نجوم
مليون فكرة وفكرة
بس ابدئي
يلا شدي حيلك

علي فكرة يا نهر كلمتك دي تتقال علي كل المتزوجين
مش بس عنتر وعبلة
بعد سنة من الزواج بيقولها هم الاتنين لبعض
بعد 3 سنين بيقولها كل اللي يعرفوهم

انا مش من رأيكوا خالص بصراحه
هههههههههههههههه
الزواج حياه جيله لأن الزوجه بتكون من نفس الزوج فبيفهموا بعض(وخلقنا لكم من أنفسكم ازواجا لتسكنوا اليها وجعنا بينكم مودة ورحمه)
يبقى ازاي تقولوا كده بقى

ايه يا لف انتي مش عايشه بالدنيا ولا ايه

مين فيهم مطبق الايه الكريمه

دول وكانهم بيتزوجو بعض عشان ينتقمو من بعض

دا عادل لسه مختصر اللي بيحصل بالحقيقه

صح يا عادل؟

بصي ده رأيي
لما اجرب مش عارفه هايكون نفس الرأي والا لأ ههههههههههه
بس اللي انا متأكده منه ان رأيي مابيتغيرش لأنه نابع من شخصيتي وشخصيتي مش بتتغير
ههههههههههههههه

بكرة نقعد علي الحيطة .......وكملي انتي
ياما قلنا الكلام دة قبل كدة
قصدي قبل الفاس متقع في الراس
خلينا في موضوعنا
تعالوا نشوف المنيل علي عينة عنتر عمل اية الزمن معاة
بس ادعولة يخرج بالسلامة لانة النهاردة داخل القسم

الحلقة الرابعة : عنتر في قسم العتبة

عنتر دلوقت قدام العسكري عشان ياخد بيانته
العسكري أسمك-
- عنتر بن شداد العبسي
- وشداد أيه بسلامته الحبل
- من غير تريقة
-طيب يا أحلي أخواتها عمرك
-40 سنة
- ساكن فين
-في السعودية
العسكري وقف منطور مخضوضاً
-هلا هلا أبو الشباب إيش لونك
- الحمد الله
- إيش بتسوي بمصر
-ولا جاي أسوي معاملة بنكية وبأخد أغراضي وعلي ديرتي
- إيش تبغي شاي جهوة ينسون / يتذكرون هههههههههه
-ههههههههه لا أبغي شاي
-أنت ياد يا دنجل إ نت ياله
دنجل-خير يا باشويش
- كوباية شاي من قهوة بعرة من علي أخر الشارع بسرعة ياله
دنجل- حمامة يا معلمي قصدي يا باشويش
العسكري ينظر لعنتر ويقول له
والله يا شيخ العرب أبغي منك شيء والله وكيلك يا شيخ تساعدني فيها
عنتر- إيش
- الواد إبني مرضوش يدخلوه حربية مع أن الواد ذكي جدا تصور في الأختبارات جاله عقيد و أداله كوباية
وقاله أستحمي هنا
- إيش سوي
- الواد راح مطلع صورته ومغطسها في الميه شوفت النصاحة
- لا والله ناصح بس إيش تبغي مني
- يعني تشوفله فيزا يشتغل أي حاجة حاكم الأيد البطالة نجسة
- بس يا أخي أنا ما أملك أموال كيف ماتسمع من الأفلام تبعكم أنا راجل فقير وما أجدر أحصل فيزا لنفسي مش لإبنك
العسكري يقف غاضبا - وعاملي فيها سعودي وجاي مش عارف أبصر أيه أنت جاي مصر ليه ياد
عنتر- أبغي أسوي معاملة بنكية أرجع لجماعتي
العسكري( منتشيا)- أنت عندك جماعة ياد
- طبعا لابد كل فرد فينا يكون له جماعة
أنت تبع مين ياد
- أن مش تبع حد
- تعرف أسامة بن لادن
- مين ميعرفوش
- يعني بتعترف
- بإيه
- أنك أرهابي عند جماعة وتعرف بن لادن---- علي الحجز لحد من نتصل بأمن الدولة تحقق معاك
عنتر- أمن الدولة لااااااااااااااااااااااا

يتبع

:****((: :****((: :****((:


تعتقد عنتر هيجرالو ايه يا عادل؟؟؟؟؟؟؟؟

احنا مش جيبنا سيرة امن الدولة
يبقي ربنا يستر علينا وعلي المنتدي

بس يا جماعة بعد ما عنتر غاب المدة دي كلها عبلة قلقت عليه جداً خصوصا بعد رحله الواد إتأجلت عشان البسة
( القطة يعني ) بتاعة حضرة الناظر ضاعت فبقي المشوار بتاع عنتر ملهوش لازمة( مين المشوار ولا عنتر ) لأ عنتر.. المشوار يوه حتخلينا نغلط في الراجل ليه

بس لما عبلة قلقت جامد راحت لأم فوزي العرافة لقت عندها غسيل لما خلصت لبست العدة و وولعت البخور
وندهت علي عبلة وقالتلها

-عونيا يا حبيبتي
- عايزاكي في موضوع كدة
- عادة ولا مخصوص
-مخصوص
- أطلعي برةتلاقي الواد حنظلة أقطعي بون ب 50درهم وتعالي
- كتير
- كتير مين مين يا حبيبتي ده أنا عمل عرض خاص بمناسبة ذهاب الأهلي لليابان. الأهلاوية ب 50 والزملكاوية ب 950

- طيب أنا حأحجز و أجيلك
أم فوزي مبتهددش يا إسمك أيه أنتي
بعد أنا راحت وحجزت جت لأم فوزي و قالتلها
-يا أم فوزي جوزي بقالو يجي 3 شهور وزيادة لا حس ولا خبر و لا حتي e-mail
- طب متزعليش حأشفهولك
أم فوزي تحط بخور ع النار ( حلف بر وورق اللوري )
أشتاتا أشتوت بعيد بعيد بعيييييييييييييد متأذوهاش يا أسيادنا
عبلة - أي فيلم الخالة نوسة ده ، يا ولية أنجزي عشان نصي الوحش قصدي جوزي
أم فوزي - بس في طلبات الأول لازم تجيبيها عشان أسيادنا يسعدوني
- أيه هي الطلبات
أم فوزي- ورك نمله عندها إكتئاب
-غيره
- وديك متجوز عرفي وحمار مخطط ماشي علي حل شعره و نسر متدلع فافي
وخروف محشي جاموسة حامل في وائل
وألف درهم مقدم اتعاب
- أتعاب ليه هو انتي مرتضي منصور
- خِلصنا تجييبي الحاجات دي وتيجي خلال 3 اربع سنين حنجبلك جوزك ومعاه ضمان سنتين وممكن تأخديه تأجير تمليكي

عبلة تركت أم فوزي وبتبرطم

كان مالي و مال الجواز أديني إتهببت

حسبي الله ونعم الوكيل
حسبي الله ونعم الوكيل
حسبي الله ونعم الوكيل

يتبع