عاوز حقى..وتوزيع صكوك اموال القطاع العام

من طرف **عابد** 12/1/2009, 23:14

عاوز حقى

كله ياخد
حقه كامل
سهم فى المال
العمومى
ياللا يا فلاح
وعامل
وانت يا موظف
حكومى
مد ايدك
هات وريدك
خد فى دمك
من سمومى
ادى حقك
جوه صكك
ياللا خد
مستنى ايه
خد وحطه
جوه فكك
ياللا عُضّ
اقفل عليه
وارجع امشى
بعيد ف عكك
وانسى انك
من همومى
اصلنا حكومه
نزيهه
ما بناكل
حق الغلابه
امر واضح
بالبديهه
وادى حقك
خدته يابا
هييه ياعم ..
اظن راضى
ياللا اهتف
للحكومه
خدت حقك
بالتراضى
بالتمام
من غير ظلومه
بتقول ايه؟
ايه الورقه ديه؟؟
هي دى حقك
فى بلدك
حق ثابت
مش هديه
حق ملكك
ليك لوحدك
بتقول ايه؟
تعمل ايه بيها؟؟
انت حر
ده حر مالك
بتقول ايه
مين يشتريها؟؟
ايوه كده
بَيّن جمالك
شوف يا بويا
خدمه منى
راح أدلك
ع اللى شارى
بس اوعى
تقوللو عنى
الا يزعل
وانت دارى
بس لما
تبيع تجينى
ولا راح تنسى
الحلاوه؟؟
برضه انا
باخدم بعينى
للمحبه
مش دناوه
روح له ياللا
وبيع وكيّش
واقبض القرشين
ف جيبك
واتكسى
ورَوّح مريّش
وافتكر صاحبك
حبيبك
هوه راجل
عنده غيه
يشترى
ورق الصكوك
كل ورقه
قصادها ميه
ياللا قول
لاختك واخوك
قرش سهل
يفك عوزه
تاخده حالا ّ
يا للا سارع
اقبضه وكرر
فى جوزه
واشتريلك
جوز كوارع
تبقى عشوه
وتبقى ليله
من سنين
ما عشتهاش
عيش فى نشوه
مع الحليله
واعتبر حقك
ماجاش
بس اياك
يوم تقول
ان انا ندل
ووصولى
ولا تسأل
ع الاصول
او تقوللى
فين اصولى
او تعيط
او تزيط
ولاّ من اهلك
يجولى
قوللى انا
اجيبلك
اصولك
يابن والدى
طب منين
دى الاصول
ماعادتش عندى
و بره دارك
من سنين
وانت نايم
نوم يافندى
خدها جارك
مين؟؟؟
كوهين!!!

من طرف humanity 13/1/2009, 03:04

طب نقول ايه يعني تتوقع هايدوا الناس ايه ماهما باعوا كل حاجه
ناقص يبيعوا الشعب في مذاد علني تصدق فكره ياترى انا هاطلع بكام؟

من طرف أحمد ابو المجد 22/1/2009, 16:11

جامدة موت

عاوز حقى..وتوزيع صكوك اموال القطاع العام

عاوز حقى..وتوزيع صكوك اموال القطاع العام

رد: عاوز حقى..وتوزيع صكوك اموال القطاع العام

رد: عاوز حقى..وتوزيع صكوك اموال القطاع العام