اخر قصائد احمد فؤاد>>نؤيد سيادتك

من طرف **المتمرد** 27/2/2009, 14:23

اخر قصائد احمد فؤاد نجم في الرئيس مبارك

نؤيد سيادتك

نؤيد سيادتك لفترة جديدة

نكمل خلالها المسيرة السعيدة

و بالمرة فيها نبيع الحديدة

مفيش حاجة تانية نبيعها خلاص

*****

نؤيد سيادتك لأجل المزيد

من اللي تحقق بفضلك أكيد

بقينا خلاص ع الحميد المجيد

و ربك لوحده ف ايده الخلاص

*****

نبايع سيادته ولا حد غيره

كفاية علينا نبرطع في خيره

و نوم شعب مصر العظيمة و شخيره

يقول للحرامي ما تسرق كمان

*****

نبايع سيادته وابنه وحفيده

مفيش زي فكره قديمه و جديده

خرابك يا مالطة حيحصل بإيده

ومين فيكي يعني بيسمع آذان

*****

نبوس إيد سيادتك و رجلك كمان

تخليك معانا يا ريس عشان

وجودك ضرورة فرضها الزمان

و من غير وجودك حقيقي نضيع

*****

دي مصر بتاعتك و احنا ضيوفك

كفايا علينا يا ريس نشوفك

و عاذرين سيادتك و فاهمين ظروفك

عليك بس تؤمر و احنا نطيع

*****

في جزمة سيادتك كلابك يبوسوا

و فوق الغلابة بجزمهم يدوسوا

و شعبك ليلاتي يا ريس غموسه

مذلة و مهانة و حوجة و مر

*****

لكن يعني ما دمنا شعب انتساب

و دايما وأبدا ف حالة غياب

ماتعملش لينا يا ريس حساب

دي عزبة سيادتك و فيها انت حر

*****

و دستور مادستورش مش فارقة خالص

كلام فاضي كله يا فندم بناقص

كفاية علينا الفساد اللي ماصص

عرقنا و معشش و ضارب جذوره

*****

و إيه يعني تهري جتتنا البلاوي

يوماتي كوارث فضايح رشاوي

كفاية علينا القعاد في القهاوي

بنستنى لما الوريث ييجي دوره